ازاي التكنولوجيا سهلت علي مالك حياته اليومية والعملية؟

النهارده يااصدقائي هنتكلم عن موضوع من الآخر كده ،  يخص كل واحد فينا ،  ناس كتير بتشتكي من الوقت، والتشتت، والمهام اللي بتتراكم، ودايمًا الجملة اللي بنسمعها: "مش فاضي ـ انا شغلي 12 ساعة انا معنديش اي وقت نهائي والحياة صعبة وشايل دليما الهم والغم .

بس هل المشكلة فعلًا في الوقت؟ ولا في طريقة استخدامنا للتقنية اللي بين إيدينا؟ تعالوا نعيش النهارده مع بطل جديد من أبطال العقل الرقمي الاخ مالك هو البطل اليوم اللي فكر وحاول ولقي طريقة يوفر بيها وقت وجهد  تساعده في حياته اليومية والعملية .

وقبل أي حاجة، صليتوا على النبي؟ اللهم صل وسلم وبارك على سيدنا محمد

نبدأ بسم الله ، ويلا بينا ياأبطال 

البداية دائما صعبة علي كل واحد 

مالك شاب بيشتغل دوام كامل حوالي 12 ساعة يوميا ، وعنده شغل خاص صغير بيحاول يطوره، وبيحب يقرأ ويتعلم، بس دايمًا بيصحى متأخر، ويفضل يجري ورا الوقت، ويخلص اليوم وهو مش فاكر عمل إيه ولاحول ولاقوة الا بالله في حياته للاسف .

صاحبه سأله مرة:  هو إنت بتشتغل قدي، ومع ذلك دايما وراك حاجات متأخرة ؟  مالك ضحك وقاله: أنا طول اليوم مشغول، بس مفيش حاجة بتخلص للاسف .

الروتين اليومي المتكرر بلا نتيجة 

يصحى متأخر
ينسى مفاتيحه
يتصل بحد يوصله
يطلع الشغل ناسي ميعاد الاجتماع
يفتح الإيميل متأخر
يرجع ينام متأخر

وهكذا كل يوم علي هذا المنوال العقيم للاسف مالك حياته مميته وكئيبة .

اليوم اللي غير حياة مالك 180 درجة 

في يوم وهو قاعد زهقان، فتح يوتيوب، ولقى فيديو بعنوان:

 كيف تنظم يومك باستخدام الذكاء الاصطناعي والتكنولوجيا الحالية ؟

شاف الفيديو، وبدأ يسمع عن أدوات اسمها:

- Trello

- Google Calendar

- Notion

- To Do List

- تطبيقات تذكير ونوم وتركيز
واثناء الفيديو تم ترشيح المدونة اللي قلما تجد زيها وهي مدونة العقل الرقمي وحد من اصدقائه رشحهاله للمشاهدة.

قال لنفسه:  يعني ممكن الموبايل اللي شاغلني طول الوقت ،  هو نفسه اللي يساعدني؟ وفعلا جدد النية وعزم علي الانطلاق 

وبدأ رحلة البحث من جديد .

اول أداة غيرت حياة مالك

مالك حمل تطبيق اسمه  Google Keep  وبدأ يكتب فيه الحاجات اللي بتجيله في دماغه طول اليوم

لقى نفسه بدل ماينسي اللي كان عاوزه بدأ يراجع اللي بيكتبه يوميا  .

بعدها جرب Google Calendar، وبقى يحجز مواعيده بالساعة
بقى بيجيله إشعار قبل كل معاد، واتغيرت الدنيا وبقت زي الفل .

الادوات اللي نفعت مع مالك وظبطت معاه : 

1. Google Keep للملاحظات الفجائية

2. Google Calendar للمواعيد

3. To Do List للمهام اليومية (زي Microsoft To Do)

4. Forest أو Tide للتركيز والبعد عن الموبايل وقت الشغل

والنتجة كانت ؟

مالك بعد أسبوع كتب في ملاحظته :  أنا ماكنتش محتاج وقت أكتر  أنا كنت محتاج تنظيم أكترليس الا والحمد لله تم التنظيم بنجاح.

وبدأ يحس إن التكنولوجيا مش بس تسلية ،  دي ممكن تكون مدير شخصي صغير في جيبه والحمد لله رب العالمين 

التمرين لك ايها القاريء الجميل :

لو انت مكان مالك، جرب النهارده  الاتي :

نزل Google Keep وسجل أول ٣ ملاحظات تيجي في بالك

افتح Google Calendar، وحجز ميعاد بسيط لنفسك بكرة (مثلا وقت قراءة أو صلاة أو تمشية)

نزل تطبيق To Do، واكتب ٣ مهام بس تعملهم بكرة

جرب تطبيق Forest واشتغل 25 دقيقة من غير ما تلمس موبايلك

السؤال ليك ؟

• هل التكنولوجيا بتخدمني؟ ولا بتستهلكني؟

• هل انا فعلا مشغول؟ ولا مش منظم؟

• طب إيه أول خطوة أبدأ بيها من دلوقتي؟

الحلقة الجاية:

مالك قال:  أنا اتعلمت أنظم وقتي ،  بس هل هقدر استخدم التكنولوجيا في شغلي كمان؟

استنونا في الحلقة الجاية ان شاء الله :

مالك والعمل الذكي – وازاي تدير شغلك من موبايلك؟

لو وصلت لحد هنا، فانت فعلا معانا في الطريق
جرب حاجة واحدة بس من اللي فوق، ولو نفعتك، ادعيلي و ارجع وقولي في التعليقات
                              "أنا جربت ودي كانت النتيجة..." وربنا يوفقك

                                          واي سؤال نفسك فيه اسأله سيب الباقي علينا

وماتنساش لو انت مهتم بمقالاتنا ومجالاتنا السابقه ادخل علي مدونة العقل الرقمي ، وكمان اخر مقاله كانت عن الذكاء الاصطناعي ولغة الالة 

والسلام عليكم ورحمة الله وبركاته 

تعديل المقال